On tipawòl kréyòl ka di : « apatoudi kouri, sé sav ola ou k’ay. »
Dépi kèk tan nou ka vwè péyi-la anchiraj parapòt a on viris. Nou ka chiradé-nou pak-an-pak : dé bò pou dé bò.
Okoumansman sé té pou on zafè a moun ka asèpté pwan vaksen kont moun ka dérifizé pwan vaksen.
Tout sòt rézo-bwapatat mété grennsèl a-yo, moun mété-yo ka jiré, chak kan-la ka di sé parapòt a lòt-la tini tousa moun ka mò ankaz kon lopital, nonm pa ka fè rèd, fanm ké vini branhangn, timoun kay fèt difòm, épi..épi…
Gouvèlman-la pousé bwadifé, èvè on lwa pou oblijé moun-lasanté vaksiné atoutfòs, ki yo vlé, ki yo pa vlé, sansa yo ka mété anba-do a-yo dèwò, yo pa kay menm trapé on dèkwa manjé.
Difé pri, malfétè rantré adan gawoulé-la, lokazyon-la té two bèl, yo pwofité pou yo té kasé tousa yo té pé kasé, mété difé, brilé, dékalboré…
Olyé gouvèlman-la té kalanjé, fè on lasanblan bat-aryè, i pisimyé montré sé li i mèt an péyi-la, i pwan lèskalyé alamonté.
E mi konsa nou ka vwè Gwada noutout ka swadizandi nou enmé, nou ka vwè péyi-la ozabwa.
Moun ka baré, malfétè ka rakété, loto ka brilé….
Moun vaksiné jis pè di sa, pou sé lézòt-la pa jiré-yo é trété-yo konsidi yo té ké trèt a péyi a-yo.
Dòktè é fanmasyen wont di yo dakò pou vaksiné moun.
Vyékò i ja pwan twa doz vaksen a-yo ka razé masonn lè yo ka déplasé anvil pou moun pa voyé wòch asi yo.
Adan on menm fanmi, yonn ka méprizé lòt.
Kant an-mwen, an sèten Gouvèlman-la sav sa i ka fè, menmsi yo ka fè lasanblan ka bigidi, yo sav fo yo divizé, chiktayé tout popilasyon moun si yo vlé gadé-yo anbajouk !
Si noutout té ka konpwann sa, nou té ké arèsté onfwa-lamenm pwan vwazen an-nou pou lèlmi an-nou.
